Veiðihúsið Flóðvangur var reist árið 1964, í kjölfar samninga um leigu stangveiðiréttar í Vatnsdalsá til John Ashley-Coopers.  Flóðvangur er staðsettur vestan megin við "Flóðið" og þar dvelja veiðimenn laxasvæðis í góðu yfirlæti meðan dvöl þeirra stendur.  Lögð er mikil áhersla á gott og fjölbreytt fæði. 

Á haustmánuðum 2003 hófust framkvæmdir á viðbyggingu við Flóðvang, ásamt endurbótum á upprunalega veiðihúsinu, sem gjörbreytti allri aðstöðu fyrir veiðimenn og starfsfólk.  Hart var unnið frá hausti til vors og verkið var fullkomnað í maí árið 2004.

Nýr og endurbættur Flóðvangur er afar glæsilegur og öll aðstaða eins og best verður á kosið. 2 rúm er í hverju herbergi og aðstaðan einstaklega notarleg.  Herbergin eru hönnuð með hljóðlæti í huga, þykkar hurðir og veggir tryggja að ekki er hljóbært milli herbergja.  Fataskápar eru í hverju herbergi og rými í þeim til að geyma töskur ofl.  Í hverju herbergi er að auki salernis- og sturtuaðstaða, auk baðsloppa og handklæða. Heitur nuddpottur er utan dyra, gegnt út frá sturtu- og gufubaði. Setustofa er í andyri þar sem fólk getur sest niður og skrafað saman.  Þar er einnig sjóvarp til staðar. 

Í afar notarlegum borðsal er framreiddur morgun-, hádegis- og kvöldverður.  Þá er hægt að nálgast kaffibrúsa og nesti hjá starfsfólki til að hafa með sér til veiða. Að loknu borðhaldi sest fólk gjarnan niður í þægilegri setustofunni þar sem fallegt útsýnið blasir við gestunum. 3 verandir eru utan við veiðihúsið þar sem eru stólar og borð, og fólk getur sest niður undir berum himni. Þá getur verið tilvalið að taka stuttan hring á litlum golfvelli umhverfis Flóðvang ef svo ber undir.

Það eina sem veiðimenn þurfa í raun að hafa með sér í töskunum, fyrir utan veiðigræjurnar, er tannburstinn góði.  Öll rúm eru uppábúin og herbergi ræst reglulega milli þess sem veiðimenn eru úti við á.